Поэзия (2008)

Поэзия относится к раннему творчеству Шамиля Алядина. Большинство своих поэтических произведений Шамиль Алядин написал еще в довоенные годы. Для большего удобства пользователей, перечень сборников автора с полным списком стихотворений, в них вошедших, собраны в разделе "Поэзия".

Ордугъа кетем

Ай-Петри астында — бир татар коюнде,
Кунь батса, джоюлса, тынчлана орталыкъ.
Сельбилер янында алчакъ, дым эвде,
Авлакътан липильдеп корюне ярыкъ.

Нафени беклейлер: анасы, къардашы,
Долмасы сувугъан софранынъ башында.
«Вай, балам, эвлядым, ананъны беклетме!
Баврымда буюдинъ, кельдинъ бу яшынъа».

Кеч ола, ай догъа чытырман дагъларда;
Хызметни битирип шенъ Нафе келе.
Сыгъыргъа ем бере, козь эте ахыргъа.
Сонъ кире къапыдан, севине — куле.

— Беклеген куньлерим кельсе етишип,
Сандыкъны эльге алыр, поездгъа минермиз.
Бу майлы къалпакъны каптинармускъа берип,
Бизлер де къызыл аскер шлеми киермиз.

Чокъ козь яш акъыздынъ агъамнынъ пешинден.
Манъа да агълама, сызлама менимчюн.
Къуван сен, байрам эт, мен ёлгъа тюшкенде;
Къызыл Орду чагъыра, йигитлик, эрликчюн.

Ватанны этрафтан вашилер саргъанлар,
Тиш къайрай, улуйлар ичери кирмеге.
Биз омюр сюремиз шуретли топракъта,
Ким истер юртуны душмангъа бермеге!

Козь яшы ят бизге, агълама анам:
Бир кунь танъ аткъанда къапынъны къакъарым.
Гюльсюмге сёйленъиз, ордудан къайтсам,
Достларны топлар да, бир байрам япарым.!

1935 с.