Şiirler (2008)

Поэзия относится к раннему творчеству Шамиля Алядина. Большинство своих поэтических произведений Шамиль Алядин написал еще в довоенные годы. Для большего удобства пользователей, перечень сборников автора с полным списком стихотворений, в них вошедших, собраны в разделе "Поэзия".

Kervan qızı

Kemer qapıdan kervan keçti;
Kervanda senmi ediñ, Muminat?
Deve toqtap çoqraqtan suv içti;
Çılbırnı tartqan senmi ediñ, Muminat?

Selâmımnı almadıñ, bilmem niçün?
Közlerime baqmadıñ, ürktiñ menden.
Maña bir söz aytmadıñ, bilmem niçün?!
Tüşünceli nazarlar sezdim sende.

Çatma-çatma qaşlarıñnen açuvlanma,
Bu yağmursız, bulutsız avalarda!
Meni yabancı bir adam sanma;
Tuvğanlarım bar menim Buharada.

Çoq yerlerni dolandım. Qırğızlarnen
Ateş yaqtım, qonuştım gecelerde.
At sürüsi yanında qalmıqlarnen
Qımız içtim taz noğay çöllerinde.

Men eşittim, qaranlıq qışlaqlarda
Küneş doğğan, yurtlarda baar olğan.
İçin-için ağlağan otarlarda
Çobanlarnıñ qalbine quvanç tolğan.

Men eşittim, develerge atlanıp,
İnstitutqa ketken özbek qadını.
Cail dehqan kollektivge bağlanıp,
Halılarğa yazğan Lenin adını.

Kervan qızı, men bu yerli degilim;
Uzaqlardan keldim selâm ketirip.
Bir söz söyle, alevlensin göñülim;
Qart şeerge kireyim baş köterip.

Buhara,
1930 s.